नरैनापुर (बाँके) । ‘समयमै भर्ना, समयमै ज्ञानः गुणस्तरीय शिक्षा सबैको अभियान’ भन्ने नाराका साथ शुक्रबारदेखि नरैनापुर गाउँपालिकाको छ वटै वडामा एकैसाथ विद्यार्थी भर्ना अभियान शुरु हुने भएको छ । नरैनापुर गाउँपालिकाको शिक्षा शाखामार्फत विद्यालय बाहिर रहेका विद्यार्थीलाई विद्यालयमा ल्याउने उद्देश्यका साथ विद्यार्थी भर्ना अभियान शुरु गर्न लागिएको नरैनापुर गाँउपालिका अध्यक्ष इश्तियाक अहमद शाहले बताए ।
आज शिक्षा समितिको बैठकलाई सम्बोधन गर्दै अध्यक्ष शाहले विद्यालय भर्ना अभियानमा विद्यार्थीहरुको सहभागिता उत्साहजनक भएपनि असार नलाग्दै पुनः विद्यालय भन्दा बाहिर जाने गरेकोले विद्यार्थीहरुलाई टिकाउने गरी योजना बनाएर अगाडि बढ्न शिक्षा समितिलाई निर्देशन दिए । अध्यक्ष शाहले नामका लागि मात्र दर्ता भएका मदरसाहरुलाई खारेज गर्ने बताए । नरैनापुर गाँउपालिकाका प्रमुख प्रशासकीय अधिकृत मणिराम खरालले जुनसुकै बहानामा विद्यार्थीहरुले बीचमै बिद्यालय छोड्नु राम्रो नभएको भन्दै यसका लागि सम्बन्धित बिद्यालय र अभिभावकलाई गम्भीर बन्न आग्रह गरे । उनले विद्यार्थी टिकाउन र गुणस्तरीय शिक्षा दिन नसक्ने विद्यालयलाई कारवाही गर्ने बताए ।
योजना शाखा प्रमुख प्रकाश अधिकारीले लोक सेवाबाट आएका शिक्षकहरुलाई मनपरी सहमतिपत्र दिने काम बन्द गरी शिक्षाको गुणस्तर सुधार गर्नतर्फ केन्द्रित हुन बिद्यालयका प्रधानाध्यपकहरुलाई आग्रह गरे । शिक्षा शाखा प्रमुख कृष्ण थारुले विद्यालय जाने उमेर समूहका कोही बालबालिका पनि विद्यालय जानबाट बञ्चित हुन नपरोस् भन्दै भव्यरुपमा घरदैलो अभियान संचालन गर्न आग्रह गरे । शिक्षा शाखा प्रमुख थारुले मदरसा शिक्षालाई गाउँपालिकाले व्यवस्थित गर्ने तयारी गरेको बताउँदै २०८० को भर्ना अभियानमा असफल हुने मदरसा र विद्यालयलाई नियमानुसार कारवाही गर्ने बताए । शिक्षा समितिका सदस्य एवं गाउँपालिका अध्यक्षका स्वकीय सचिव बिरजेन्द्र यादवले शिक्षा क्षेत्रमा हुने राजनीतिलाई अन्त्य गरी गुणस्तरीय शिक्षा प्रदान गर्नतर्फ केन्द्रित हुन सुझाव दिए ।
