नेपालगञ्ज । विभिन्न राजनीतिक दलहरुले प्यालेस्टाइनमाथि इजरायलले निरन्तर हमला गरिरहेको भन्दै त्यसको भत्सर्ना गरेका छन् । क्रान्तिकारी कम्युनिष्ट पार्टी नेपाल बाँकेको संयोजन र अग्रसरतामा बसेको विभिन्न राजनीतिक दलहरुको संयुक्त बैठकले इजरायलले प्यालेस्टाइनी जनतामाथि गरेको आक्रमण र दमनको कडा भर्त्सना गर्दै प्यालेस्टाइनी जनताको न्यायपूर्ण संघर्षमा ऐक्यबद्धता व्यक्त गर्ने निर्णय गरेको छ । उक्त न्यायपूर्ण संघर्षमा ऐक्यबद्धता जनाउँदै आगामी पौष ७ गतेदेखि प्यालेस्टाइनी जनताको जनसंहारका विरुद्ध जिल्लाका विभिन्न स्थानमा हस्ताक्षर संकलन र विरोधको कार्यक्रम गर्ने निर्णय गरिएको क्रान्तिकारी कम्युनिष्ट पार्टी नेपाल ६ नम्बर प्रदेश संयोजक दिपक शाहीले बताए ।
नेपालगञ्जको धम्बोझी, त्रिभुवन चोक, पुष्पलाल चोक, कोहलपुर चौराह, खजुरा, राप्तीसोनारी लगायतका स्थानमा हस्ताक्षर संकलन र विरोधको कार्यक्रम गर्ने तय भएको बताइएको छ । क्रान्तिकारी कम्युनिष्ट पार्टी नेपालका बाँके जिल्ला सेक्रेटरी गुणनिधि आचार्यको अध्यक्षतामा पार्टी कार्यालयमा बसेको बैठकमा नेकपा (माओवादी केन्द्र), नेकपा (मसाल), नेकपा, नेकपा एस, वैज्ञानिक समाजवादी पार्टी, जसपा, क्रान्तिकारी कम्युनिष्ट पार्टी नेपाल, राष्ट्रिय जनमोर्चा (राजमो) लगायत पार्टीका प्रमुख एवम् प्रतिनिधिहरुको उपस्थिति रहेको थियो । वैठकमा पूर्व उपसभामुख तथा माओवादी केन्द्रका बाँके जिल्ला इन्चार्ज पुर्णा सुवेदी, राजमोका नेता कृष्ण पाण्डे, क्रान्तिकारी कम्युनिष्ट पार्टीका ६ नम्बर प्रदेश संयोजक दिपक शाही लगायतको उपस्थिति थियो ।
गत २०८० साल असोज २० गते तदनुसार २०२३ अक्टोबर ०७ तारिखदेखि शुरु भएको हमास र इजायलका बीचमा चलेको युद्ध निरन्तर कायम रहेको छ । शुरुवातमा हमासद्वारा इजरायलको विरुद्ध आक्रमण गरिएको भएता पनि त्यसपछि इजरायलले पालेस्टाइनी राज्यको एक क्षेत्र गाजापट्टीमा व्यापक सैन्य कारवाही चलाएर जनसंहार गरिरहेको भन्दै विभिन्न राजनीतिक दलहरुले भत्सर्ना गरेका हुन् ।
